Begeistra for Nepal

Lillian Dombestein 27.03.09

Nordfjord folkehøgskule har valgt å ha fokus på to av Normisjon sine prosjekt i Nepal; dagsenter for psykisk utviklingshemma barn i Kathmandu (ABBS) og sjukehuset i Okhaldhunga. Alt til jul hadde skulen nådd innsamlingsmålet for heile skuleåret; 100 000 kroner. Meir om innsamlingsarbeidet kan du lese her.

Loddtrekning
Etter kvart blei det akuelt at to elevar kunne få dra til Nepal på ei reise arrangert av regionleiar i Sogn og Fjordane, Jan Magne Moi, som tidlegare har vore misjonær i landet. Loddtrekning blant elevane måtte til og dei heldige vart Maud Evensen og Vilde Øverby
Jentene fortel om eventyrlege dagar, først i Kathmandu der dei fekk sjå ABBS kor Normisjons utsending Alice Holmen har sitt arbeid.
 - Vi såg at både barn og tilsette hadde det veldig bra der. Barna strålte og var så ivrige på å vise oss alt dei kunne, seier Vilde Øverby.

Vilde Øverby og Maud Evensen saman med stab ved ABBS, dagsenteret for psykisk utviklingshemma barn i Kathmandu som Nordfjord folkehøgskule gir økonomisk støtte til. Normisjons utsending Alice Holmen t.h.

Kontrast

- Velkommen til den verkelege verda! sa lege Erik Bøhler i Okhaldhunga til jentene ved Nordfjord folkehøgskule. Skulen gir støtte til sjukehuset gjennom Normisjon.

Turgruppa og dei to elevane reiste til sjukehuset i Okhaldhunga der Normisjons utsendingar Kristin og Erik Bøhler arbeider. 
-  Erik Bøhler møtte oss med orda "Velkommen til den verkelege verda." Det traff meg veldig. Eg fekk kjenne på kroppen kor heldige vi er her heime, seier Maud. 
- I møte med fattigdommen fekk eg dårleg samvit for å ha så dyrt kamera, seier Vilde.
- Men det var iaugefallande at folk var så mykje meir takknemlege og glade enn i Norge. Dei verka rett og slett lykkelege og hadde tiltru til livet.
Vilde fortel om ei kvinne dei møtte. Ho hadde gått aleine i fleire timar med rier for å kome til sjukehuset. Det viste seg at fostervatnet var heilt misfarga då ho kom, men ho fødte likevel eit friskt barn.
 - Slikt er heilt utenkeleg i Norge, men i Okhaldhunga er det vanleg. Dei stiller ikkje ein gong spørsmål ved det. Kontrasten til livet i Norge blir veldig stor.


Foredrag
Vilde seier dei fekk godt inntrykk av Normisjons arbeid i Nepal.
- Sjukehuset i Okhaldhunga er eit kristent sjukehus. Det betyr at ein lege kan behandle alle pasientar utan å spørje kva kaste dei tilhøyrer. Slik er det ikkje på andre sjukehus i Nepal.
- Kva har turen gjort med dykk?
- Før tenkte eg at eg er glad eg bur i Norge for her har vi det så godt. No tenkjer eg at eg er glad eg bur i eit land som er så rikt at eg har pengar eg kan bruke på å hjelpe andre, seier Vilde.   
Jentene seier dei treng tid på fordøye alle inntrykk dei fekk på den tretten dagar lange turen. Dei har halde foredrag med bilder og film for heile skulen, besøkt ei forening i distriktet, og til hausten skal dei tilbake til folkehøgskulen og halde foredrag for eit nytt kull elevar. 
Maud satsar på vernepleieutdanning til hausten og vil prøve å få praksisperiode i Nepal når den tid kjem. Ho kan godt tenkje seg jobb i utlandet på sikt. 
 
Giverglede
- Korleis er tilbakemeldingane de får når de fortel?
- Vi har jobba ganske lenge for å samle inn pengar, no synes alle her på skulen at Nepal har kome mykje nærare gjennom det vi har opplevd. Engasjementet har ikkje akkurat blitt mindre.
Maud sier folk i bygda er flinke til å støtte og gi pengar til prosjektet.
- Her om dagen stod vi på ferjekaien og selde kaffi og bollar for prosjektet. Resultatet blei 3700 kroner på to og ein halv time. Ein mann gav oss 600 kroner for to kaffe og to bollar. Det var imponerande.
Elevane ved Nordfjord fokehøgskule vil samle inn pengar til Nepal heilt fram til skuleslutt. Heile skulen reiser no på ei vekes tur med seglskuta Statsråd Lehmkuhl. Ombord vil dei bruke tid på å lage smykker og hekle panneband som dei skal selge på Sandane i Nordfjord.
 - Vi vonar vi vil greie å samle inn 10 000 kroner til før skuleåret er omme, seier Vilde engasjert.
























  Del på Facebook Del på Twitter

Støtt Region Sogn og Fjordane: